Inter hætt við að reyna að kaupa Carvalho og Deco

Sky greinir frá því í kvöld að ítalska liðið Inter Milan sé hætt við að reyna að kaupa Portúgalana Ricardo Carvalho og Deco frá Chelsea þar sem enska liðið vilji hreinlega fá of mikið fyrir leikmennina.

Jose Mourinho, þjálfari Inter, hefur lýst opinberlega yfir miklum áhuga á að fá Carvalho og Deco til sín á ný en hann fékk þá á sínum tíma til enska liðsins.

Það fylgir sögunni að áhugi Chelsea á brasilíska bakverðinum Maicon sé að trufla viðskipti félaganna því Inter vill alls ekki selja hann.

Heimildir Sky eru að Chelsea sé að hækka kaupverðið á köppunum tveimur til þess að þvinga Inter til að selja sér Brasilíumanninn sem lék frábærlega með Brasilíu í Álfukeppninni á dögunum.