Benitez: Við getum vel spilað sóknarbolta

Rafael Benitez, stjóri Liverpool, var himinlifandi með stórsigur sinna manna á Real Madrid í kvöld og gefur lítið fyrir þær gagnrýnisraddir að hans lið spili engan sóknarbolta.

„Ég er meðvitaður um að fólk á Spáni heldur að mín lið sæki ekki neitt. Lítið samt á þessi úrslit og lítið á mörkin 119 sem við skoruðum í fyrra. Þau segja aðra sögu," sagði Benitez en af hverju er hans lið svona gott í Evrópukeppnum?

„Af hverju erum við svona góðir í Evrópu? Við nálgumst Evrópuleiki með miklu sjálfstrausti og bara rétt á allan hátt. Síðustu fimm ár hefur þetta lið verið mjög gott í Evrópukeppnum. Stuðningsmenn okkar kunna að meta það og skilja hvað við höfum afrekað."