Mijatovic er hættur hjá Real Madrid

Predrag Mijatovic, Íþróttastjóri Real Madrid, hefur náð samkomulagi við félagið um að hætta störfum einu ári fyrr en samningur hans hljóðar upp á. Félagið tilkynnti þetta á heimasíðu sinni í dag.

Það hefur verið búist við því að Mijatovic myndi hætta allar götur síðan að upp komst um kosningarsvindl forsetans Ramon Calderon í janúar. Hann hefur líka verið gagnrýndur fyrir að takast ekki að ná í toppleikmenn til Real Madrid.

Mijatovic segir í tilkynningunni á heimasíðunni að þetta sé rétti tíminn til að hætta þar sem forsetakosningar fari fram 14. júní næstkomandi og hann sé sáttur við að hafa skilað tveimur meistaratitlum á sínum tíma í starfi.