Ronaldo: Kominn í mitt besta form

Portúgalinn Cristiano Ronaldo fór á kostum í liði Man. Utd á Emirates í kvöld. Skoraði tvö mörk, annað þeirra úr aukaspyrnu á 40 metra færi.

Hann hefur verið á mikilli uppleið síðustu vikur og segist núna vera kominn í sitt besta form.

„Ég held það já. Mér hefur liðið mjög vel í síðustu leikjum og fundist ég vera í miklu formi. Þetta er mikilvægasti tími ársins og bestu leikirnir fram undan," sagði Ronaldo en hvað með aukaspyrnuna?

„Það var erfitt að verjast þessu skoti þar sem nokkuð flökt var á boltanum. Ég geri annars mitt besta til þess að skora og þetta var gott mark."

Ronaldo fann til með félaga sínum, Darren Fletcher, sem verður í banni í úrslitaleiknum.

„Það var mjög svekkjandi því hann á skilið að spila úrslitaleikinn. Hann er frábær leikmaður, hleypur mikið og er virkilega góður fyrir liðið. Hann á skilið að spila úrslitaleikinn en svona er fótboltinn," sagði Ronaldo.