Eiður Smári tók ekki þátt í fagnaðarlátunum

Eiður Smári Guðjohnsen sýndi sínu gamla félagi og vinum í Chelsea-liðinu virðingu með því að fagna ekki eftir að Barcelona hafði stolið sæti í úrslitaleik Meistaradeildarinnar af Chelsea.

Í sjónvarpi eftir leikinn var Eiður ekki sýnilegur og í tugum mynda sem eru af Börsungum að fagna á vellinum er Eiður hvergi sjáanlegur.

Má því ljóst vera að hann hafi viljað sýna tilhlýðilega virðingu við stuðningsmenn Chelsea sem enn hugsa hlýlega til Íslendingsins.

Eiður er einnig góðvinur þeirra Johns Terry og Franks Lampard og hefur líklega fundið til með vinum sínum sem yfirgefa keppnina á sársaukafullan hátt annað árið í röð.