Laporta: Barcelona er búið að bjóða í David Villa

Forsetinn Joan Laporta hjá Barcelona staðfesti í dag við spænska fjölmiðla að Katalóníufélagið væri ekki búið að gefast upp á að fá framherjann David Villa til félagsins en erkifjendurnir í Real Madrid hafa dregið sig út úr kapphlaupinu á þeim forsendum að kaupverðið sem Valencia vilji fá sé of hátt.

„Við viljum fá David Villa og höfum lagt fram sanngjarnt kauptilboð til Valencia. Kaupverðið er nær 40 milljónum evra en 50 milljónum evra," er haft eftir Laporta.

Chelsea og Manchester United eru enn sögð vera inni í myndinni um að fá hinn 27 ára gamla Villa en leikmaðurinn hefur þó gefið það út að hann vilji frekar vera áfram á Spáni en fara til Englands.