Alex Ferguson: Ég hef fulla trú á þessum strákum

Sir Alex Ferguson, stjóri Manchester United, sagði eftir tapleikinn á móti Besiktas á Old Trafford í kvöld að ungir leikmenn liðsins ættu enn eftir ýmislegt ólært. Ferguson gaf mörgum lykilmönnum frí í leiknum og United tapaði sínum fyrsta heimaleik í Meistaradeildinni síðan 2005.

„Við vorum of óþolinmóðir en það er samt ekkert slæmt. Þeir eru ungir og það er viðbúið að þeir geri mistök. Þetta var góð frammistaða og við spiluðum vel þó að ekki hafi okkur tekist að ná úrslitunum sem við vildum," sagði Ferguson sem gæti gefið þessum leikmönnum aftur tækifæri í lokaleiknum á móti Wolfsburg.

„Það fer mikið eftir því hvernig staðan á leikmannahópnum verður. Ég hef fulla trú á þessum strákum. Besiktas pakkaði í vörn í seinni hálfleik og það var mjög erfitt fyrir unga leikmenn að skilja það. Þetta var góð reynsla fyrir þá," sagði Ferguson.