Danir segja hreint nei við upptöku evrunnar

Samkvæmt nýrri skoðanakönnun Danske Bank hafa Danir aldrei verið fráhverfari því að taka upp evruna sem mynt í stað dönsku krónunnar.

Í frétt um málið í Jyllands Posten segir að alls sögðu 54,9% aðspurðra vera mótfallnir evrunni en 42% segja já eða kannski við upptöku hennar. Þetta er hæsta hlutfall þeirra sem fráhverfir eru evrunni síðan Danske Bank hóf þessar skoðanakannanir sínar og jafnframt hefur munurinn á já og nei, 12,9%, aldrei verið meiri.

Munur er enn meiri þegar teknir eru út þeir sem sögðu hreint nei, eða 43,5% og hreint já eða 25,5%. Frá síðustu könnun, en þær eru gerðar ársfjórðungslega, hefur þeim sem segja hreint já fækkað um tæp 7 prósentustig.

Í blaðinu segir að mikil andstaða gegn evrunni nú skýrist af skuldavandamálum Írlands og fleiri landa í Evrópu.

Þess ber að geta að danska krónan er fest við gengi evrunnar með mjög þröngum vikmörkum.