Ásdís vann einvígið gegn Helgu í kúluvarpi á MÍ

Meistaramót Íslands í frjálsum íþróttum stendur nú yfir í Frjálsíþróttahöllinni í Laugardal en þar er samankomið fremsta frjálsíþróttamót landsins.

Keppni hófst í dag kl. 12.30 og stendur til um 16 leytið og heldur svo áfram á morgun frá kl. 11 til 16.

Einn af hápunktum helgarinnar var einvígi Ármannskvennanna Ásdísar Hjálmsdóttur og Helgu Margrétar Þorsteinsdóttur í kúluvarpi en keppni er nú lokið og þar hafði Ásdís betur.

Ásdís varpaði kúlunni 14,98 metra sem er glæsilegur árangur en hún var að bæta sig um einhverja 40 sm en Helga Margrét var rúmum metra á eftir henni í öðru sætinu með 13,85 metra. Ágústa Tryggvadóttir hafnaði í þriðja sætinu með 11,60 metra.