Almunia varði 12 þúsund skot í síðasta leik

Pep Guardiola, þjálfari Barcelona, segist ekki hafa nokkrar áhyggjur af Theo Walcott fyrir leik Barca og og Arsenal í Meistaradeildinni í kvöld.

Walcott kom af bekknum í fyrri leik liðanna og breytti algjörlega gangi leiksins. Walcott verður væntanlega í byrjunarliði Arsenal í kvöld en Guardiola óttast það ekkert.

„Við skulum hafa það á hreinu að það var ekki Walcott sem skipti mestu máli í síðasta leik. Það var Almunia sem varði 12 þúsund skot í leiknum," sagði Guardiola en hann segist geta slökkt á Walcott með því að Barcelona haldi boltanum innan síns liðs.

„Walcott er rosalega fljótur, er með sterka fætur og spilaði vissulega vel gegn okkur eins og í síðasta leik í deildinni. Við munum samt reyna að halda boltanum innan okkar liðs, það er besta leiðin til þess að stöðva Arsenal og Walcott."