Nýliðarnir með góða sigra í kvöld

Gunnar Berg Viktorsson tapaði í kvöld sínum fyrsta leik sem þjálfari Hauka í N1-deild karla.

Halldór Ingólfsson var rekinn sem þjálfari liðsins fyrir skömmu en liðið á í harðri baráttu um sæti í úrslitakeppninni.

Nýliðar Aftureldingar skelltu Haukum í Mosfellsbænum í kvöld, 25-24, en hinir nýliðarnir, Selfoss, gerðu sér lítið fyrir og unnu HK-inga á útivelli á sama tíma, 27-24.

Þetta breytir þó litlu um stöðu liðanna í deildinni þar sem Afturelding er enn í næstneðsta sætinu og Selfoss í því neðsta.

Bæði lið munu þó gefa allt sitt í að bjarga sæti sínu í deildinni á lokasprettinum en fimm umferðir eru enn óleiknar og því tíu stig enn í pottinum.

Valur er í þriðja neðsta sætinu með tólf stig, fjórum stigum á undan Aftureldingu og sex stigum á undan Selfossi.

Leikurinn í Mosfellsbæ í kvöld var æsispennandi en Haukar náðu mest fjögurra marka forystu í seinni hálfleik. Afturelding sneri þó leiknum sér í hag á lokakaflanum og tryggði sér sigurinn.

Selfyssingar hafði fjögurra marka forystu í hálfleik gegn HK, 13-9, en heimamenn komust yfir í upphafi þess síðari. Selfoss gaf þá aftur í og tryggði sér að lokum nokkuð þægilegan sigur.

HK er með átján stig í fjórða sæti deildarinnar og Haukar í því fimmta með sautján.

HK - Selfoss 24-27 (9-13)

Mörk HK: Ólafur Bjarki Ragnarsson 11, Vilhelm Gauti Bergsveinsson 4, Bjarki Már Gunnarsson2, Atli Ævar Ingólfsson 2, Sigurjón F. Björnsson 2, Bjarki Már Elísson 1, Ármann D. Sigurðsson 1, Hákon Bridde 1.

Mörk Selfoss: Guðjón F. Drengsson 10, Milan Ivancev 7, Ragnar Jóhannsson 6, Atli Hjörvar Einarsson 2, Gunnar ingi Jónsson 2.

Afturelding - Haukar 25-24 (11-13)

Mörk Aftureldingar: Sverrir Hermannsson 7, Hilmar Stefánsson 6, Þrándur Gíslason 4, Reynir Ingi Árnason 4, Ásgeir Jónsson 1, Bjarni Aron Þórðarson 1, Arnar Freyr Theódórsson 1, Jón Andri Helgason 1.

Mörk Hauka: Freyr Brynjarsson 6, Þórður Rafn Guðmundsson 6, Guðmundur Árni Ólafsson 4, Björgvin Þór Hólmgeirsson 4, Tjörvi Þorgeirsson 2, Heimir Óli Heimisson 2.