Umfjöllun: KR átti í engum vandræðum með Stjörnuna

KR-ingar settust í bílstjórasætið í einvíginu um Íslandsmeistaratitilinn í kvöld þegar þeir unnu Stjörnuna, 101- 81, í þriðja leik liðanna og leiða því einvígið 2-1. KR keyrði yfir Stjörnuna í þriðja leikhlutanum og voru tuttugu stigum yfir þegar einn leikhluti var eftir. Marcus Walker átti enn einn stórleikinn og skoraði 33 stig.

DHL-höllin var orðin full hálftíma fyrir leik KR-inga og Stjörnunnar í þriðja leik liðanna í úrslitaeinvígi Iceland-Express deild karla í körfubolta. Staðan var 1-1 í einvíginu fyrir leikinn í kvöld. KR-ingar unni fyrsta leik liðanna hér í DHL-höllinni virkilega sannfærandi, en Stjarnan neitaði að gefast upp og jöfnuðu einvígið 1-1 í síðasta leik í Ásgarði. Algjör lykilleikur hér í Vesturbænum en liðið sem kæmist 2-1 yfir myndi setjast í bílstjórasætið í þessi einvígi.

Til að byrja með skiptust liðin á því að hafa forystu og menn voru virkilega heitir í skotum sínum. Stjörnumenn komu sérstaklega ákveðnir til leiks og keyrðu vel upp hraðan í leiknum, ólíkt þeim og það virtist koma KR-ingum í opna skjöldu. Þegar fyrsti leikhluti var hálfnaður var staðan 21-13 fyrir gestina frá Garðabæ. Justin Shouse, leikmaður Stjörnunnar, lék einstaklega vel í fyrsta fjórðung og stýrði sóknarleik gestanna eins og herforingi. Staðan var 33-23 eftir fyrsta leikhlutann og Stjörnumenn mættu allt öðru vísi til leiks en í síðasta leik hér í DHL-höllinni.

KR-ingar skoruðu fyrstu fimm stig annars leikhluta á aðeins 40 sekúndum og komu brjálaðir til leiks. Þegar leið á annan leikhluta var orðið sjóðandi heitt í mönnum og leikmönnum lenti nokkrum sinum saman enda mikið undir. Skarphéðinn Freyr Ingason, leikmaður KR, kom inn af bekknum með mikinn kraft í varnarleik KR-inga og þeir fóru strax að saxa enn meira á forskot Stjörnunnar. Þegar tvær mínútur voru eftir að öðrum leikhluta var staðan 49-48 fyrir KR og þeir í miðju áhlaupi á gestina. Rétt fyrir lok fyrri hálfleik setti Brynjar Þór Björnsson, leikmaður KR, niður þriggja stiga körfu og kom KR yfir 56-54 sem var staðan í hálfleik.

KR-ingar héldu áfram uppteknum hætti í byrjun þriðja leikhluta og voru greinilega komnir í gírinn. Marcus Walker var að leika virkilega vel og Stjarnan réði hreinlega ekki við hann. Þegar þriðja leikhluta var hálfnaður var staðan 69-60 fyrir heimamenn. Furðulegt atvik átti sér stað um það leiti en Fannar Ólafsson, fyrirliði KR, var dæmdur brotlegur og fyrstu viðbrögð leikmannsins var að henda boltanum í andlitið á Renato Lindmets. Hvorki dómararnir né eftirlitdómarar sáu atvikið og slapp því Fannar með skrekkinn. Hrafn Kristjánsson, þjálfari KR, tók Fannar umsvifalaust útaf vellinum og kældi leikmanninn niður.

Þriðji leikhlutinn hefur alltaf verð KR-inga í vetur og það var enginn breyting á því í kvöld. KR-ingar keyrðu upp hraðann í leiknum og Stjörnumenn réðu ekkert við þá. Þegar tvær mínútur voru eftir af þriðja fjórðung var staðan 77-61 og útlitið virkilega dökkt hjá Stjörnunni. Staðan fyrir loka fjórðunginn var 82-63. Stjarnan skoraði aðeins níu stig í þriðja leikhluta sem verður að teljast skelfilegt.

Í fjórða leikhluta hélt sýningin áfram hjá KR og á sama tími versnaði leikur Stjörnunnar. Sóknarleikur KR-ingar var hreinn unaður á að horfa og Marcus Walker var í algjörum sérflokki. Niðurstaðan því 101-81 sigur KR-ingar sem leiða því einvígið 2-1.



KR-Stjarnan 101-81 (23-33, 33-21, 26-9, 19-18)

KR: Marcus Walker 33, Brynjar Þór Björnsson 18, Pavel Ermolinskij 16/13 fráköst/5 stoðsendingar, Hreggviður Magnússon 13, Finnur Atli Magnússon 8/8 fráköst, Ágúst Angantýsson 4/4 fráköst, Ólafur Már Ægisson 4, Fannar Ólafsson 4, Jón Orri Kristjánsson 1/5 fráköst/3 varin skot, Páll Fannar Helgason 0, Martin Hermannsson 0, Skarphéðinn Freyr Ingason 0.

Stjarnan: Marvin Valdimarsson 15/8 fráköst/3 varin skot, Renato Lindmets 14/7 fráköst, Jovan Zdravevski 13/6 fráköst, Justin Shouse 12, Fannar Freyr Helgason 12, Guðjón Lárusson 9/5 fráköst, Daníel G. Guðmundsson 6, Magnús Guðmundsson 0, Tómas Þórður Hilmarsson 0, Dagur Kár Jónsson 0, Ólafur Aron Ingvason 0, Kjartan Atli Kjartansson 0.

Dómarar: Rögnvaldur Hreiðarsson, Jón Guðmundsson