Nistelrooy samdi við Malaga

Ruud van Nistelrooy snýr aftur í spænsku úrvalsdeildina á næsta keppnistímabili en hann hefur gengið frá samningi við Malaga.

Nistelrooy á glæsilegan feril að baki en hann lék síðast með Hamburg í Þýskalandi. Hann er 35 ára gamall en samningur hans við Hamburg rann úr í lok tímabilsins.

Malaga tilkynnti um komu Nistelrooy á Twitter-síðunni sinni en engar frekari upplýsingar voru gefnar.

Samkvæmt spænskum fjölmiðlum hefur Nistelrooy gengist undir læknisskoðun og skrifað undir eins árs samning við félagið. Malaga varð í ellefta sæti spænsku úrvalsdeildarinnar á síðasta tímabili.

Van Nistelrooy fór til Hamburg í janúar í fyrra eftir að hafa verið hjá Real Madrid í fjögur ár. Þar áður spilaði hann með PSV Eindhoven og Manchester United.