Stelpurnar höfðu heppnina með sér og mæta Tékklandi í umspilinu

Íslenska kvennalandsliðið í handbolta lenti á móti Tékklandi í umspilinu um laus sæti á Heimsmeistaramótinu í Serbíu sem fer fram í desember á næsta ári en dregið var í Belgrad í hádeginu. Ísland var í neðri styrkleikaflokknum þar sem að liðið komst ekki upp úr sínum riðli á EM í Serbíu og því var alltaf ljóst að liðið myndi fá sterka mótherja í umspilinu.

Íslensku stelpurnar höfðu heppnina með sér því mun sterkari þjóðir voru í efri styrkleikaflokknum því íslenska liðið hefði getað mætt Danmörku, Rússlandi, Spáni, Rúmeníu, Frakklandi, Þýskalandi eða Svíþjóð.

Leikirnir fara fram 1./2. júni og 8./9. júní en sú þjóð sem nær betri árangri út úr þessum tveimur leikjum, heima og að heiman, mun tryggja sér farseðil á HM í Serbíu.

Íslenska liðið tryggði sér sæti á HM í Brasilíu 2011 með því að slá lið Úkraínu út eftir tvo umspilsleiki.

Leikirnir í umspilinu um laus sæti á HM 2013:

Tyrkland - Danmörk

Ísland- Tékkland

Makedónía - Spánn

Holland - Rússland

Slóvakía - Rúmenía

Þýskaland - Úkraína

Svíþjóð - Pólland

Frakkland - Króatía