Kona reynir að komast að í NFL-deildinni

Lauren Silberman er búin að skrá sig á spjöld sögunnar en hún er fyrsta konan sem reynir að komast að hjá liði í NFL-deildinni.

Silberman tekur þessa dagana þátt í æfingabúðum fyrir leikmenn sem vilja komast inn í deildina. Það hefur engin kona gert áður.

Silberman ætlar ekki að takast á við tröllin sem leika í deildinni heldur er hún að reyna að komast að sem sparkari. Fáum sögum fer reyndar af því hvað hún getur sparkað langt.

Hin 28 ára gamla Silberman gerir sér grein fyrir því að hún á ekki mikla möguleika að komast að í deildinni.

"Ég er að leggja hart að mér en er samt raunsæ á mína möguleika. Ég vona samt að þetta framlag mitt virki hvetjandi á aðrar konur sem vilja elta drauma sína. Ég hef fengið ótrúlegan stuðning alls staðar að úr heiminum," sagði Silberman.