Handtekinn tvisvar sinnum sama daginn

Fyrrum útherji Detroit Lions, Titus Young, er ekkert að gera sérstaka hluti þessa dagana. Honum tókst að láta handtaka sig tvisvar sinnum á innan við 15 klukkutímum. Geri aðrir betur.

Young tók ólöglega beygju með lögregluna beint fyrir aftan sig. Afar skynsamlegt. Hún stöðvaði Young og komst þá að því að hann væri að keyra fullur.

Leikmaðurinn var eðlilega handtekinn og farið með hann í skýrslutöku. Eftir það var honum sleppt en bíllinn var tekinn af honum.

Nokkrum tímum síðar var Young handtekinn á ný þar sem hann var að reyna að stela bílnum sínum úr vörslu lögreglunnar. Hann fær því ekki bílinn í bráð.

Young er 23 ára gamall og kom í NFL-deildina árið 2011. Lions losaði sig við hann á dögunum og hann er í leit að félagi. Þessi uppákoma styrkir ekki möguleika hans á að komast aftur í deildina.