Þórir Ólafsson segir að fjölmiðlafárið eftir fyrri leik sinna manna í Kielce gegn Rhein-Neckar Löwen í Meistaradeild Evrópu hafi lítil áhrif haft á leikmannahópinn.
Sem kunnugt er gekk mikið á á milli þjálfara liðanna, þeirra GuðmundarGuðmundssonar hjá Löwen og TalantsDujshebaev, þjálfara Þóris hjá Kielce.
„Við fengum frið til einbeita okkur að leiknum. Það var auðvitað mikil umfjöllun um þetta en maður reyndi bara að útiloka það,“ sagði Þórir í samtali við Fréttablaðið í gær. Hann er staddur hér á landi með landsliðinu sem leikur tvo æfingaleiki við Austurríki um helgina.
Mikil spenna var í síðari leik liðanna sem fór fram á mánudagskvöld. Liðin voru jöfn að markatölu eftir báða leikina en Löwen komst áfram á fleiri mörkum skoruðum á útivelli.
„Þetta mál vann ekki gegn okkur. Við spiluðum mjög vel í þessum leik en við getum sjálfum okkur um kennt að hafa ekki staðið okkur betur í riðlakeppninni og fengið þar af leiðandi auðveldari andstæðing í 16-liða úrslitunum.“
Þórir segist vera ánægður með Dujshebaev sem þjálfara og kann vel við hann. „Hann er fínn kall – auðvitað mikill keppnismaður og blóðheitur, eins og flestir þjálfarar. Hann er fær þjálfari og ég er ánægður með að spila undir hans stjórn.“
Eins og áður hefur verið greint frá mun Þórir yfirgefa herbúðir Kielce í lok tímabilsins og óljóst hvað tekur við. Þórir er þó með nokkur járn í eldinum.
„Ég er að vinna í þessum málum með mínum umboðsmanni. Markaðurinn fór ekki á hreyfingu fyrr en eftir að EM í Danmörku lauk,“ segir Þórir sem var lengi á mála hjá Lübbecke í Þýskalandi. Hann segist opinn fyrir því að snúa aftur í þýsku deildina. „Alveg eins. Það er allt opið.“
Fárið truflaði okkur ekki
