Viðvörun frá Veðurstofu: Snarpar vindhviður næsta sólarhringinn

Veðurstofan vill vekja athygli á spá um hvassviðri með snörpum vindhviðum syðst á landinu í nótt og á morgun, föstudag. Þetta kemur fram í tilkynningu frá vakthafandi veðurfræðingi hjá Veðurstofu Íslands.

„Langt suður í hafi er víðáttumikið 983 mb lægðasvæði, sem þokast norður á bóginn. Hvessir því smám saman úr austri sunnanlands og vindhraði verður 13-18 m/s undir Eyjafjöllum, í Mýrdal og Öræfum í nótt og á morgun,“ segir í tilkynningunni.

Vindhviður geta náð 30 m/s á þessum slóðum en reiknað er með að dragi úr vindi annað kvöld. Vegfarendum með aftanívagna er ráðlagt að fara ekki um þessi svæði fyrr en vind lægir.