Sparkarinn Chris Boswell tryggði Pittsburgh Steelers sæti í næstu umferð þegar hann skoraði vallarmark fjórtán sekúndum fyrir leikslok en algjört klúður heimamanna gerði Pittsburgh-liðinu auðvelt fyrir að snúa tapi í sigur á lokasekúndum leiksins. Svipmyndir frá leiknum.
Pittsburgh Steelers komst í 15-0 í leiknum en liðsmenn Cincinnati Bengals, sem höfðu tapað öllum sex leikjum sínum í úrslitakeppni undanfarin 25 ár, unnu sig aftur inn í leikinn í lokaleikhlutanum með því að skora sextán stig á rúmum tólf mínútum.
Ben Roethlisberger meiddist í upphafi fjórða leikhlutans og varaleikstjórnandinn Landry Jones virtist vera búinn að kasta frá sér sigrinum þegar hann lét varnarmenn Bengals komast inn í sendingu frá sér þegar 1:45 mínúta var eftir.
Cincinnati Bengals var þá með forystu 16-15 og með boltannþ Það stefndi því allt í langþráðan sigur heimamanna en svo fór nú ekki.
Sjá einnig:Höfðingjarnir frá Kansas City enduðu 22 ára bið í nótt
Hlauparinn Jeremy Hill missti boltann strax í fyrstu sóknartilraun Bengals þegar heimamenn þurftu bara að finna leiðir til að eyða tímanum. Roethlisberger hafði verið keyrður inn í klefa á hnjaskvagninum eftir að hafa meiðst á öxl átti þá dramatíska endurkomu inn í leikinn og leiddi lokasóknina.
Það var ekki nóg með að Hill tapaði boltanum því tvö afar dýrkeypt víti á varnarmenn heimamanna gáfu liðsmönnum Pittsburgh Steelers sannkallað dauðafæri.
Varnarmennirnir Vontaze Burfict og Adam Jones fengu samtals 30 jarda refsingu sem þýddu að Boswell þurfti bara að sparka 35 jarda til að tryggja sínu liði sigurinn.
Þeir Jeremy Hill, Vontaze Burfict og Adam Jones sváfu örugglega ekki mikið í nótt enda skúrkarnir í enn einu tapi Cincinnati Bengals liðsins. Cincinnati Bengals hefur verið með flott lið undanfarin ár en er gjörsamlega fyrirmunað að vinna leik í úrslitakeppninni.
Pittsburgh Steelers er hinsvegar komið áfram í undanúrslit Ameríkudeildarinnar þar sem liðið mætir Denver Broncos á útivelli um næstu helgi.
Sjá einnig:Verður einn kaldasti leikur í sögu NFL-deildarinnar
Tveir leikir fara fram í úrslitakeppni NFL-deildarinnar í dag og verða þeir báðir í beinni útsendingu á Stöð 2 Sport. Minnesota Vikings tekur á móti Seattle Seahawks klukkan 18:05 og klukkan 21:40 mætast Washington Redskins og Green Bay Packers.
