Celtic er komið áfram í þriðju umferð forkeppni Meistaradeildarinnar eftir 3-0 sigur á Gíbraltar-liðinu Lincoln Red Imps í kvöld.
Lincoln Red Imps hafði komið öllum á óvart með að vinna fyrri leikinn á Gíbraltar 1-0 en það var fyrsti keppnisleikur Brendan Rodgers sem knattspyrnustjóra Celtic.
Brendan Rodgers, sem var rekinn frá Liverpool í fyrravetur, byrjaði því ekki vel með nýja liðið sitt en hans menn voru fljótir að leiðrétta hlutina í leiknum í kvöld.
Öll þrjú mörk Celtic-liðsins komu á sex mínútna kafla í fyrri hálfleiknum. Mikael Lustig, Leigh Griffiths og Patrick Roberts skoruðu mörkin. Þau komu á 23., 26. og 29. mínútu.
Celtic fékk fleiri færi til að bæta við mörkum, sérstaklega Leigh Griffiths, en sigurinn og sætið í næstu umferð var aldrei í hættu.
Celtic mætir Astana frá Kasakstan í næstu umferð og Skotarnir geta því farið að undirbúa sig undir mjög langt ferðalag.
Celtic-menn björguðu andliti sínu og stjórans Brendan Rodgers í kvöld
Tengdar fréttir
Brendan Rodgers skammast sín ekki fyrir tapið á Gíbraltar í gær
Stjóraferill Brendan Rodgers hjá skoska félaginu Celtic byrjaði ekki glæsilega því liðið tapaði óvænt 1-0 á Gíbraltar í gær í fyrri leik sínum á móti Lincoln Red Imps í annarri umferð forkeppni Meistaradeildarinnar.
Rodgers lofaði að gera vel í Evrópu en byrjaði á tapi gegn liði frá Gíbraltar
Ein óvæntustu úrslit í sögu Meistaradeildarinnar litu dagsins ljós í kvöld.
