Fyrsti bikarsigur Celta Vigo á Bernabéu

Celta Vigo vann flottan sigur á Evrópumeisturum Real Madrid, 2-1, í fyrri leik liðanna í átta liða úrslitum spænska Konungsbikarsins í kvöld en leikurinn fór fram á Santiago Bernabéu, heimavelli Real.

Þetta er fyrsti sigur Celta Vigo í bikarnum á Bernabéu frá upphafi og er liðið nú í fínni stöðu fyrir heimaleikinn sem fer fram eftir viku.

Öll mörk leiksins voru skoruð á sex mínútna kafla. Iago Aspas kom gestunum yfir, 1-0, á 64. mínútu en brasilíski bakvörðurinn Marcelo jafnaði metin á 69. mínútu. Celta tryggði sér sigurinn í næstu sókn með marki Jonny Castro, 2-1.

Real Madrid tapaði aðeins tveimur mótsleikjum allt síðasta ár en er nú búið að tapa tveimur leikjum í röð í deild og bikar á aðeins þremur dögum.

Real tapaði fyrir Sevilla, 2-1, í spænsku deildinni um helgina en liðið er án sigurs í síðustu þremur leikjum sínum.