Eldsvoði í Camden

Mikill eldur braust út á Camden markaðinum í London í nótt og voru um sjötíu slökkviliðsmenn í nokkra tíma að berjast við eldinn. Byggingin sem verst varð úti er þriggja hæða og virðist sem eldurinn hafi komið upp á annarri hæð hússins.

Eldsins varð vart rétt fyrir miðnætti að enskum tíma og tæpum fjórum tímum síðar hafði tekist að slökkva þótt enn sé viðbúnaður á svæðinu, að því er fram kemur í frétt Sky sjónvarpsstöðvarinnar.

Svo virðist sem enginn hafi slasast í brunanum en árið 2008 kom upp mikill eldur í markaðinum, þannig að loka þurfti í nokkra mánuði.

Camden markaðurinn er afar vinsæll ferðamannastaður.