Fellibylur veldur usla á stærstu eyju Japans

Þúsundir manna var skipað að yfirgefa heimili sín á Honshu, stærstu eyju Japans, þegar fellibylurinn Noru gekk þar á land í dag. Miklar rigningar og hvassviðri fylgdi storminum sem olli flóðum í ám.

Noru var til skamms tíma í fimmta flokki fellibylja, öflugasta flokki þeirra, en er talin verða að hitabeltislægð síðar í dag. Stormurinn hefur reynst óvenjulega langlífur.

Úrkoma á Honshu mældist 40 millímetrar á milli kl. 9 og 10 í morgun að staðartíma. Yfirvöld vöruðu þá við hættu á aurskriðum og að ár gætu flætt yfir bakka sína, samkvæmt frétt Reuters-fréttastofunnar. Sjö þúsund manns í borginni Fukui var skipað að yfirgefa heimili sín í morgun en rýmingu var aflétt kl. 11.

Ríkisútvarpið NHK segir að um fimmtíu manns hafi slasast í óveðrinu. Tveir fórust um helgina.

Í tístinu hér fyrir neðan má sjá mynd sem bandaríski geimfarinn Jack Fischer tók af Noru frá Alþjóðlegu geimstöðinni 1. ágúst.

When Mother Nature gets to spinning, it can be an awesome but scary sight. Looks like super Typhoon #Noru is gaining momentum. #EarthShapes pic.twitter.com/hR8gyYlhEs

— Jack Fischer (@Astro2fish) August 1, 2017