Viðgerð á Herjólfi frestað fram á haust

Vegagerðin tilkynnti í dag að viðgerð á Herjólfi hafi verið frestað en skipið hefur verið í slipp í Hafnarfirði síðan í byrjun vikunnar. Elliði Vignisson bæjarstjóri Vestmannaeyjabæjar gagnrýnir upplýsingaflæðið í tengslum við viðgerðirnar. 

Norska ferjan Röst sem er svipað skip og Herjólfur hefur sinnt siglingum í Landeyjarhöfn á meðan Herjólfur var í viðgerð. Í tilkynningu Vegagerðarinnar kemur fram að þegar kom í ljós kom að ekki fengist leyfi fyrir Röst til siglinga í Þorlákshöfn og ekki í Landeyjahöfn eftir 30. september var reynt að flýta sem kostur er viðgerð á Herjólfi.

„Reynt var að fá undanþágu fyrir siglingar Rastar í Landeyjahöfn fyrstu dagana í október en norska siglingastofnunin hafnaði þeirri beiðni eiganda skipsins í gær. Því var sú ákvörðun tekin í beinu framhaldi af því að fresta viðgerðinni og gera Herjólf tilbúinn til siglinga þannig að ekki kæmi til þess að hlé yrði á siglingum til Vestmannaeyja. “

Undanþágubeiðni hafnað

Vegagerðin hefur þegar hafið leit að öðru skipi sem geti fengið leyfi til þess að sigla í Landeyjarhöfn og Þorlákshöfn eftir 1.október. Rekstur Herjólfs er bundinn í þurrleigu- og rekstrarsamningum við Eimskip. Eimskip er ábyrgt fyrir rekstri skipsins, viðhaldi og viðgerðum þess.

Skemmdirnar á Herjólfi komu í ljós í reglubundnu eftirliti í slipptöku Herjólfs á vegum Eimskip síðastliðið vor. Skemmdirnar eru í sérsmíðuðum stjórnborðs niðurfærslugír aðalvélar skipsins.Varahlutir sem þurfi í viðgerðina seinkaði ítrekað og þar sem norska siglingarstofnunin hafnaði undanþágubeiðninni fyrir Röst var ákveðið að fresta viðgerðunum á Herjólfi þangað til í Haust. Nú er unnið að því að koma Herjólfi á ný í haffært ástand þannig að skipið geti hafið áætlanasiglingar frá Vestmannaeyjum sem fyrst.

Elliði Vignisson bæjarstjóri Vestmannaeyjabæjar skrifaði pistil um Herjólf áður en tilkynningin barst frá Vegagerðinni. Þar gagnrýnir hann harðlega upplýsingaflæðið í kringum viðgerðina. Þar skrifar hann

„Herjólfur er í slipp í Hafnafirði.  Búið er að taka upp gírinn.  Því miður er varahluturinn hinsvegar ekki á leið til landsins.  Næsta skref er því að loka gírnum og sigla Herjólfi aftur til Eyja, jafn biluðum og hann var.“

Lásu um viðgerðina á Facebook

Elliði segir engu líkara en að Vestmanneyjarbæ, fulltrúa heimamanna, komi þetta ekki við. 

„Enn hefur til dæmis ekki komið formleg tilkynning um að Herjólfur þurfi í slipp, né heldur að hann sé í slipp, hvað þá að okkur sé tilkynnt formlega að viðgerðin gangi ekki eftir.  Við lásum um það á Facebook. Niðurstaðan er því þessi: Herjólfur var bilaður og verður það áfram.  Búið verður að taka hann úr drift í næstum tvær vikur þegar hann kemur jafn bilaður til baka.  Beinn útlagður kostnaður ríkisins hleypur á tugum milljóna og kostnaður samfélgsins ómældur. Hver ber ábyrgðina?“

Elliði segir að þetta gangi ekki svona og að Vestmannaeyjarbær þurfi að taka yfir reksturs Herjólfs. Tilkynningin frá Vegagerðinni um viðgerðina var svo send út skömmu fyrir hádegi í dag.