Margir óku framhjá rjúpnaskyttunni í kvöld án þess að bjóða aðstoð

Rjúpnaskyttan sem leitað var að á Vesturlandi í kvöld gekk lengi meðfram þjóðvegi 1 áður en björgunarsveitarfólk á leið í útkall fann hann í vegarkantinum. Skyttan fannst heil á húfi núna um klukkan tíu en hafði orðið viðskila við veiðifélaga sína í dag. Leit hófst eftir klukkan níu í kvöld.

„Hann fannst á gangi í vegarkanti á þjóðvegi 1. Fullt af bílum höfðu keyrt framhjá en enginn stoppað,“ segir Einar Einarsson hjá Björgunarsveitinni Brák á Vesturlandi í samtali við Vísi. Hann biður fólk að hafa augun opin, þessi maður hafði verið einn á gangi í langan tíma án þess að nokkur hafi stoppað og athugað með hann eða boðið honum aðstoð fyrr en björgunarsveitarfólk sá mann á gangi og stöðvuðu bílinn.

„Enginn stoppaði. Björgunarsveitin Heiðar var á leið í útkallið upp í Snjófjöll. Við höfðum fengið fyrirmæli um að fara upp á Holtavörðuheiði, upp að Endurvarpa. Þeir fundu hann þegar þeir voru á leiðinni.“

Hann hvetur fólk sem sér einstaklinga ganga við þjóðveginn í myrkri til að stöðva og ræða við viðkomandi og tryggja að allt sé í lagi.

„Enginn stoppaði, það er svolítið fúlt. Sem betur fer far hann heill á húfi.“

Einar var frekar hneykslaður á þessu. Hann ítrekar einnig að það er gríðarlega mikilvægt fyrir rjúpnaskyttur að skoða vel veðurspá áður en haldið er af stað í veiði. Bæði þurfti að leita að rjúpnaskyttum á Suðurlandi og á Vesturlandi í kvöld. 

„Þeir lögðu af stað í lélegu veðri, í rigningarsudda. Þetta eru tólf dagar og það verður gott veður einhvern tíman, ekki fara af stað í vondu veðri.“

Eins og kom fram á Vísi fyrr í kvöld er gríðarlega mikilvægt að rjúpnaskyttur kynni sér aðstæður og veðurspá og séu vel búnar. Það þarf einnig að gera ferðaáætlun og skilja eftir hjá aðstandendum. Einnig að vera með nauðsynlegan öryggisbúnað með sér eins og GPS tæki eða neyðarsendi. Það getur líka skipt sköpum að hafa auka rafhlöðu fyrir farsíma.