„Það á ekki að álasa þig fyrir að bíða í 15 mínútur, 15 daga eða 15 ár með að tilkynna kynferðisofbeldi eða áreitni“

„Ég var reið,“ sagði söngkonan Taylor Swift í viðtali við Time í dag um framburð sinn gegn manni sem var dæmdur fyrr á þessu ári fyrir að brjóta gegn henni. Time valdi í dag fólkið sem rauf þögnina sem manneskju ársins en meðal tákngervinga #MeToo herferðarinnar hjá Time var Swift sem vakti athygli á þegar hún kærði plötusnúðinn fyrir kynferðislega áreitni. Þetta er fyrsta viðtalið sem Swift samþykkir eftir að maðurinn var dæmdur sekur fyrir að káfa á berum rassi hennar. 

„Á þessu augnabliki ákvað ég að hunsa öll formlegheit réttarhalda og svara bara spurningunum,“ sagði Swift um ástæðu þess að hún ákvað að sleppa kurteisi í vitnisburði sínum. „Mér er sagt að aldrei hafi orðið rass verið notað oft í dómstólum Colorado.“

Þolandanum kennt um

Söngkonan þakkar stuðninginn frá aðdáendum sínum á meðan hún fór í gegnum þetta ferli og segir að það hafi hjálpað sér mikið að tala við Keshu sem kærði umboðsmann sinn fyrir nauðgun á síðasta ári og hafði farið í gegnum réttarkerfið með sitt mál.

Taylor var beðin um að gefa aðdáendum sínum ráð og sagði hún þá að það væri mikilvægt að vita að þolendum er oft kennt um í málum tengdum kynferðislegri áreitni og kynferðisofbeldi. „Þér gæti verið kennt um það sem gerðist, fyrir að tilkynna það eða hvernig þú brást við. Þér gæti verið látið líða eins og þú sért að bregðast of harkalega við.“

Hennar ráð er að kenna ekki sjálfum sér um og sætta sig ekki við að aðrir geri það.  

„Það á ekki að álasa þig fyrir að bíða í 15 mínútur, 15 daga eða 15 ár með að tilkynna kynferðisofbeldi eða áreitni, eða fyrir útkomuna á því hvað gerist fyrir manneskju eftir að hann eða hún ákveður að áreita þig kynferðislega eða beita þig ofbeldi.“

Plötusnúðurinn neitar að borga

Taylor segir að umræðan núna sé mikilvæg vegna þess að fólk verði meðvitaðra. „Hvernig foreldrar tala við börnin sín og hvernig þolendur vinna úr áfalli sínu, hvort sem það er nýlegt eða eldra.“

Sagði hún einnig í viðtali sínu að hugrökku konurnar og mennirnir sem hafa stigið fram á þessu ári hafi látið fólk vita að þessi misbeiting valds ætti ekki að líðast. Umræðan um kynferðislega áreitni á vinnustöðum er meiri en nokkurn tíman en samt séu margir hræddir eða þaggaðir vegna gerandans eða aðstæðnanna.

Plötusnúðurinn kærði söngkonuna vegna þess að hann var rekinn eftir að hún tilkynnti útvarpsstöðinni sem hann vann hjá um áreitnina. Hún kærði hann á móti en bað aðeins um einn dollara í skaðabætur frá honum, sem telst táknrænt í ljósi þess að hann krafðist hárra fjárhæða frá henni. 

„Þegar kviðdómur dæmdi mér í hag, var maðurinn sem áreitti mig kynferðislega dæmdur til að greiða mér einn dollara. Enn þann dag í dag hefur hann ekki greitt mér þennan dollara og ég held að það sé táknrænt.“

Á forsíðu Time eru Taylor Swift, Ashley Judd, Susan Fowler, Adama Iwu og Isabel Pascual. Athygli vekur að á myndinni sést hönd á einni konu í viðbót sem ekki er sýnt andlitið á. Þessi kona er ungur starfsmaður á sjúkrahúsi í Texas og samkvæmt frétt á vef Time táknar hún allar þær konur sem þora ekki eða geta ekki enn stigið fram með sína sögu.