Kærir Garðabæ fyrir að leyfa flóðlýsingu

Bæjarstjóra hefur verið falið að gæta hagsmuna Garðabæjar í máli sem íbúi við Túnfit í Garðabæ hefur kært til úrskurðarnefndar umhverfis- og auðlindamála.

Kæran snýr að ákvörðun bæjarráðs um að veita framkvæmdaleyfi fyrir ljósabúnaði fyrir gervigrasvöll Stjörnunnar í bæjargarði í Garðabæ.

Í kærunni segir að framkvæmdin sé hvorki í samræmi við gildandi aðal- né deiliskipulag fyrir svæðið. Því sé um brot á skipulagslögum og stjórnsýslulögum að ræða.

„Þá uppfylli framkvæmdaleyfið ekki kröfur skipulagslaga um að öll hönnunargögn verði að liggja fyrir þegar framkvæmdaleyfi er gefið út,“ segir enn fremur.

Vinnulag bæjarins er harðlega gagnrýnt í kærunni. Segir þar að bærinn hafi gefið út framkvæmdaleyfi vegna vallarins þann 18. maí 2017 og hafi hafið framkvæmdir strax daginn eftir. Íbúum hafi því ekki gefist tími til að kynna sér framkvæmdaleyfið og lögbundinn þrjátíu daga kærufrestur íbúa hafi verið virtur að vettugi.

Jafnframt er bærinn sagður reyna að koma sér undan því að klára hönnun vallarins að fullu þótt framkvæmdir séu langt komnar með því að búta framkvæmdina niður og gefa út fjölda framkvæmdaleyfa.

„Vinnulag Garðabæjar hefur gert það að verkum að jafnvel þó ÚUA úrskurði íbúum í vil í kærumáli þeirra þá eru hverfandi líkur á að gervigrasvöllurinn yrði fjarlægður. Kostnaðurinn við slíkt yrði mjög mikill og myndi lenda á íbúum Garðabæjar,“ segir í kærunni en á annan tug íbúa kærðu framkvæmdaleyfi vegna fyrri verkþátta í maí. Sú kæra er enn til meðferðar hjá úrskurðarnefndinni.

Bærinn er aukinheldur sakaður um að hraða framkvæmdum í því skyni að tryggja að völlurinn standi áfram jafnvel ef svo kynni að fara að nefndin úrskurðaði byggingu vallarins lögbrot.

Íbúinn sem um ræðir keypti hús sitt árið 2013 og stendur það rétt hjá fyrirhuguðum bæjargarði.

Segir í kærunni að umbreytingin á bæjargarðssvæðinu, þar sem útivistarsvæði sé „skipt út fyrir áberandi íþróttamannvirki“ sé grundvallarbreyting á þeim gæðum sem kærandi bjóst við í næsta nágrenni við heimili sitt og hafði verið auglýst af hálfu Garðabæjar. Íbúinn vildi ekki tjá sig um málið í samtali við Fréttablaðið.