Illa gengur að hefta skógareldana í Kaliforníu

Skógareldar í Kaliforníuríki Bandaríkjanna ógna nú stórum borgum við strandlengjuna. Gripu yfirvöld til þess ráðs að boða til frekari rýmingar á svæðum en slökkviliðsmenn hafa átt í miklum erfiðleikum við að hefta eldana sökum Santa Ana-vindsins.

Yfirvöld fyrirskipuðu rýmingar á hluta af borgunum Carpinteria og Montecito fyrr í dag en þá nálguðust eldarnir borgina Santa Barbara sem er um 160 kílómetrum norðvestur af Los Angeles.

Um hundrað þúsund manns búa í Santa Barbara. Á meðal þeirra er leikarinn Rob Lowe sem sagðist biðja fyrir heimabæ sínum.

Praying for my town. Fires closing in. Firefighters making brave stands. Could go either way. Packing to evacuate now.

— Rob Lowe (@RobLowe) December 10, 2017

Slökkviliðsmenn í Carpinetria birtu fyrr í dag mynd af skógareldunum sem nálguðust heimili við Shepard Mesa Road.

#ThomasFire -Flames advance on homes off Shepard Mesa Road in Carpinteria at 5:45 Sunday morning. pic.twitter.com/OMwPKVQ4S5

— SBCFireInfo (@EliasonMike) December 10, 2017

Um 200 þúsund manns hafa þurft að yfirgefa heimili sín í Suður Kaliforníu vegna þessara hamfara og hafa um átta hundruð byggingar orðið eldi að bráð.

Eldarnir geisa víðs vegar á Kyrrahafsströndinni milli Los Angeles og Santa Barbara. Sömuleiðis eru skógareldar sunnar í ríkinu, ekki langt frá San Diego.