Vaxandi líkur á að samningum verði sagt upp

Forsendunefnd ASÍ og SA hefur lokið störfum. Aðilar eru ekki sammála um að forsendur kjarasamninga hafi staðist.

Þetta kemur fram í tilkynningu sem ASÍ var að senda frá sér. Og þýðir með öðrum orðum að enn aukast líkur á að kjarasamningum verði sagt upp. Vísir greindi frá bullandi óánægju hjá formanni VR, Ragnari Þór Ingólfssyni, í morgun. Óhætt er að segja að vaxandi gremju megi greina hjá öllum helstu verkalýðsforkólfum.

„Fulltrúar ASÍ telja að frá því að nefndin úrskurðaði síðast í febrúar 2017 hafi ekki náðst almenn sátt um launastefnuna og því haldi uppsagnarheimildin gildi sínu,“ segir í tilkynningunni.

En, fulltrúar SA í forsendunefnd telja hins vegar að þeir kjarasamningar sem gerðir hafa verið undanfarna 12 mánuði séu í samræmi við launastefnu rammasamkomulagsins og því ekki forsendur fyrir uppsögn kjarasamninga.

„Báðir aðilar eru hins vegar sammála um að hin forsendan, sem snýr að kaupmáttaraukningu, hafi staðist.“

Svo aftur sé þessi tilkynning mátuð við málflutning Ragnars Þórs í morgun þá telur hann blekkingu fólgna í að tala um kaupmáttaraukningu þegar forsendur launahækkana eru prósentutengdar. „Ef við hækkum lægstu launin um 45 prósent gerir það 125 þúsund krónur. En hjá forstjóra ríkisfyrirtækis þá er það 800 þúsund krónur á mánuði.“