Snapchat lofar breytingum eftir óvinsæla uppfærslu

Stjórnendur samskiptaforritsins Snapchat hafa lofað notendum nýrri uppfærslu til að lægja reiðiöldur vegna breytinga sem voru gerðar á því í þeirri síðustu.

Yfir milljón manns hefur skrifað undir áskorun á vefsíðunni Change.org þar sem þess er krafist að nýjasta uppfærslan á Snapchat verði „fjarlægð“. Notendur ekki síst ósáttir við að þeir eigi erfiðara með að finna svonefndar „sögur“ í forritinu, myndir sem eru sýnilegar fyrir alla vini notenda.

Fyrirtækið svaraði undirskriftasöfnuninni og lofaði að koma með nýja uppfærslu á næstu vikum sem á að gera notendum auðveldara að finna sögurnar. Reuters-fréttastofan segir að ekki sé ljóst af því svari hvort að til standi að taka síðustu uppfærslu til baka.