Fimm létust í þyrluslysi í New York

Fimm létust þegar þyrla hrapaði í Austurá, eða East River í New York borg seint í gærkvöldi.

Tveir létust samstundis en þremur var komið á sjúkrahús þar sem þau létust í nótt. Sex voru um borð í þyrlunni en flugmaðurinn lifði slysið af. 

Flugmaðurinn náði að senda út neyðarkall rétt áður en vélin skall á vatnsfletinum og náði hann að losa sig úr öryggisbelti sínu og synda frá flakinu. Farþegar hans voru hinsvegar tryggilega bundnir í sæti sín og gátu þeir ekki losað sig fyrr en kafarar komu þeim til hjálpar. 

Þyrlufyrirtækið sem um ræðir sinnir útsýnisflugi á Manhattan og er eitt það stærsta og elsta í bransanum. 

Þetta er þriðja slysið sem þyrlur á vegum þess lenda í á ellefu árum, en árið 2009 fórust níu þegar þyrla og lítil einkaflugvél rákust saman yfir Hudson ánni. Tveimur árum áður varð annað slys þar sem allir komust lífs af.