Forsætisráðherra tilnefndur til bráðabirgða á Ítalíu

Sergio Mattarella, forseti Ítalíu, hefur beðið Carlo Cottarelli, fyrrverandi hagfræðing Alþjóðagjaldeyrissjóðsins, um að leiða starfsstjórn til bráðabirgða. Stjórnarmyndun hægripopúlistaflokkar fór út um þúfur í gær þegar forsetinn hafnaði tilnefningu þeirra til embættis fjármálaráðherra.

Cottarelli segist ætla að boða til kosninga snemma á næsta ári. Að sögn breska ríkisútvarpsins BBC er hann þekktur sem „Herra Skæri“ á Ítalíu vegna niðurskurðar á opinberum útgjöldum sem hann mælti fyrir um.

Ekki verið tekist að mynda ríkisstjórn á Ítalíu eftir þingkosningar í mars sem skiluðu ekki afgerandi niðurstöðu. Fimm stjörnu hreyfingin og Bandalagið reyndu að mynda ríkisstjórn en þeim tilraunum lauk þegar Mattarella hafnaði vali þeirra á fjármálaráðherra í gær.

Leiðtogar flokkanna brugðust ókvæða við ákvörðun forsetans sem er fordæmalaus í síðari tíma sögu Ítalíu. Krafðist Luigi Di Maio, leiðtogi Fimm stjörnu hreyfingarinnar, þess að Mattarella yrði ákærður af þinginu.

Cottarelli segist ætla að leggja fram áætlun fyrir þingið, þar á meðal nýtt fjárlagafrumvarp. Fáist sú áætlun ekki samþykkt segir hann að starfsstjórn hans segi af sér. Þá yrði kosið eftir ágúst.