Formaður knattspyrnusambands Gana gripinn við að taka á móti mútum

Ganamenn spila á Laugardalsvelli í kvöld en það gustar um knattspyrnusamband þjóðarinnar eftir að formaður sambandsins var gripinn í bólinu við að taka á móti mútum.

Í dag verður frumsýnd mynd um spillinguna í fótboltanum í Afríku en þar er Kwesi Nyantakyi, forseti knattspyrnusambands Gana, í aðalhlutverki en hann er einn valdamesti maðurinn í afríska boltanum.

Myndin er gerð af manni sem kallar sig Anas og enginn veit hvernig lítur út. Hann hefur safnað myndefni í nokkur ár þar sem verið er að múta yfirmönnum í knattspyrnuheiminum í Afríku sem og dómurum. Þar á meðal aðstoðardómara sem var á leið á HM. Sá er ekki lengur á leiðinni til Rússlands.

Í myndinni sést Nyantakyi taka við tæpum 7 milljónum króna í beinhörðum peningum. Hann er einnig í nefnd hjá FIFA og má því ekki þiggja neinar peningagjafir. Formaðurinn sagðist síðan vera með forseta landsins í vasanum og gegn sanngjarnri greiðslu geti hann hjálpað fyrirtækjum og verktökum við að ná samningum við ríkið. Forsetinn er sagður hafa brjálast vegna þessara ummæla og gefið út handtökuskipun á Nyantakyi.

Knattspyrnuunnendur í Gana hafa lengi beðið eftir því að sjá þessa mynd því þeir trúa því að nú verði hreinsað til í fótboltaheiminum þar í landi. Í gær greindu einhverjir miðlar frá því að formaðurinn væri hættur en fjölmiðlafulltrúi sambandsins segir að það sé ekki satt.

Stiklu úr myndinni frá BBC má sjá hér.