Mamic dæmdur í fangelsi en flúði | Modric kærður fyrir meinsæri

Hinn umdeildi Zdravko Mamic, sem hefur verið áhrifaríkasti maðurinn í króatíska fótboltanum um árabil, er á leið í fangelsi og stærsta stjarna Króata, Luka Modric, er ekkert í sérstökum málum.

Mamic var í dag dæmdur í sex og hálfs árs fangelsi fyrir spillingu. Hann dró að sér milljónir er hann stýrði öllu hjá Dinamo Zagreb. Hann flúði til Bosníu í gærkvöldi og óvíst hvort hægt verði að hafa hendur í hári hans.

Miðjumaður Real Madrid og fyrirliði króatíska landsliðsins, Luka Modric, var kærður fyrir meinsæri enda leikur sterkur grunur á því að hann hafi borið ljúgvitni í réttarhöldum Mamic. Mál Modric mun ekki hafa nein áhrif á þátttöku hans á HM í Rússlandi. Tekið verður á honum síðar.

Mamic hefur lengi verið umdeildur og spjöll ofanritaðs við króatíska blaðamenn síðustu ár hafa leitt það í ljós að þeir hafa beðið eftir því að losna við Mamic. Fyrr yrði ekki friður í króatíska boltanum.

Mamic var ekki bara framkvæmdastjóri Dinamo heldur var hann einnig varaforseti króatíska knattspyrnusambandsins. Í áraraðir hafa stuðningsmenn Dinamo sakað hann um að stela peningum er stórir leikmenn á borð við Modric hafa verið seldir frá félaginu.

Hann gerði svo bróðir sinn, Zoran, að þjálfara liðsins en þeir voru að lokum handteknir árið 2015. Þeir voru kærðir fyrir að draga að sér fé og svíkja undan skatti. Bróðir hans var einnig sakfelldur sem og tveir aðrir sem tóku þátt í undanskotinu.

Mamic var síðar það ár heppinn að lifa af skotárás er hann heimsótti gröf föður síns. Hann varð fyrir skoti en slapp vel.

Þó svo Mamic hafi flúið þá er þetta gleðidagur fyrir stuðningsmenn Dinamo sem eru lausir við hann. Sama hvort hann er í steininum eða Bosníu. Mikil mótmæli hafa verið gegn honum í áraraðir og því hefur fylgt lítil mæting á leiki liðsins. Þeir sem voru hvað reiðastir stofnuðu nýtt knattspyrnufélag.