Leita manns vegna líkfundar í tunnu

Ástralska lögreglan leitar nú manns sem grunaður er um að hafa myrt unga stúlku. Lík hennar fannst í tunnu á palli bíls sem talinn er vera í eigu mannsins.

Talið er að maðurinn, Zlatko Sikorsky, kunni að vera vopnaður og hefur lögreglan sagt almenningi að vera á varðbergi. Þeir sem kunni að rekast á hann eigi að forða sér og hringja í neyðarlínuna.

Leitin hófst á miðvikudag þegar lögreglunni barst tilkynning um svartan pallbíl, sem skilinn hafði verið eftir í íbúðarhverfi sunnan af borginni Brisbane. Við leit í bílnum fannst tunna á pallinum. Ofan í henni var lík - sem talið er vera af hinni sextán ára gömlu Larissu Beilby. Ekki er þó búið að bera kennsl á líkið, því það er sagt afar illa farið eftir veruna í tunnunni.

Fyrr um daginn hafði lögreglan heimsótt manninn í tengslum við hvarf stúlkunnar, en í samtali við Guardian segir rannsóknarlögreglumaður að þau hafi þekkst. Eftir heimsóknina er talið að maðurinn hafi stokkið upp í pallbílinn sinn og ekið burt á ógnarhraða.

Vitni segja að bíll mannsins sé illa farinn; skotför á rúðunum og á vélarhlífinni. Leit stendur ennþá yfir að manninum.

Hér að neðan má sjá myndband sem Guardian tók saman um málið.