Dómaraefni Trump ber af sér sakir um kynferðisbrot

Brett Kavanaugh, hæstaréttardómaraefni Donalds Trump Bandaríkjaforseta, segir að ekkert sé hæft í ásökunum um að hann hafi brotið kynferðislega á skólasystur sinni í framhaldsskóla. Bandaríkjaþing metur nú hæfi Kavanaugh til að taka sæti í Hæstarétti Bandaríkjanna.

Demókratar í dómsmálanefnd öldungadeildar Bandaríkjaþings sem fjallar um tilnefningu Kavanaugh segja að þeim hafi borist upplýsingar um meint kynferðisbrot hans gegn stúlku á framhaldsskólaárum hans. Þeir hafa vísað málinu til alríkislögreglunnar FBI, að því er segir í frétt Reuters.

Konan, sem ekki hefur verið nafngreind, sakar Kavanaugh um að hafa reynt að þröngva sér upp á hana í teiti. Kavanaugh hafi haldið henni fastri og haldið fyrir vit hennar áður en henni tókst að losna undan honum.

„Ég hafna þessum ásökunum afdráttarlaust og tvímælalaust. Ég gerði þetta ekki í framhaldsskóla né nokkru sinni,“ sagði Kavanaugh í yfirlýsingu sem Hvíta húsið sendi frá sér vegna ásakananna.

Þrátt fyrir þetta telja repúblikanar, sem eru í meirihluta í öldungadeildinni, ekki ástæðu til að fresta umfjöllun þingsins um skipan Kavanaugh. Talsmaður Chucks Grassley, formanns dómsmálanefndarinnar, segir að atkvæðagreiðsla nefndarinnar fari fram eins og áætlað var á fimmtudag.

Allt útlit er fyrir að skipan Kavanaugh verði staðfest í öldungadeildinni á næstu vikum.