Risasekt fyrir að eltast við uppljóstrara

Bandarísk yfirvöld hafa gert breska stórbankanum Barclays að greiða 15 milljónir dollara, eða rúmlega 1,8 milljarða íslenskra króna, í sekt eftir að framkvæmdastjórinn Jes Staley fékk meðal annars öryggisdeild bankans það verkefni að afhjúpa uppljóstrara.

Uppljóstrarinn varaði bankastjórnina skriflega við ráðningu ákveðins einstaklings, Tims Main, í yfirmannsstöðu vegna persónu hans og fyrri gerða í bransanum. Staley og Main voru vinir frá því að þeir störfuðu saman í fjárfestingarbankanum JP Morgan.

The Guardian segir bresk yfirvöld áður hafa sektað Jes Staley um yfir 100 milljónir íslenskra króna vegna afskipta hans af málinu.