Símon vísar því alfarið á bug að hann hygli Sveini Andra

„Umræða á þeim nótum sem verið hefur undanfarna daga kallar oft á tíðum fram slæmar hliðar fólks. Það er miður að sjá ágæta lögmenn detta í þær grafir að fara með slík gífuryrði og ásakanir um spillingu eru alvarlegar.“

Þetta segir Símon Sigvaldason dómstjóri Héraðsdóms Reykjavíkur í samtali við Vísi. Veruleg ólga hefur verið meðal lögmanna vegna þess að lögmönnunum Þorsteini Einarssyni lögmanni og einkum þó Sveini Andra Sveinssyni var úthlutað þrotabúi WOW air til skipta. Stjórnir Lögmannafélags Íslands og Félags kvenna í lögmennsku hafa óskað sérstaklega eftir upplýsingum um hvaða verkalagsreglur gilda í slíkum tilfellum.

Sakar Símon um lygar

Þá skrifaði Þórður Már Jónsson lögmaður afar harðorðan pistil sem hann birti á Facebook-síðu sinni síðdegis í gær þar sem hann sakar Símon um lygi, í frétt Vísis um málið í gær, þar sem Símon sagði að úthlutun slitabúa væri í föstum skorðum:

„Það er hrein og klár lygi hjá Símoni þegar hann segir að listinn rúlli jafnt og þétt og í réttri röð!!!“

skrifar Þórður Már og má ráða af þremur upphrópunarmerkjum að honum er heitt í hamsi:

„Listinn hvað Svein Andra varðar rúllar að því er virðist í allt öðrum takti en hjá öllum öðrum sem ég þekki. Bæði fær hann fleiri bú og síðan fær hann gjarnan eitt í einu með nokkurra mánaða millibili en ekki 2 í einu eins og aðrir. Ef listinn myndi rúlla eins og Símon segir þá myndu sömu lögmál gilda fyrir alla. Það er hins vegar ekki svo. Ég veit ekki hvað maður á að halda um þetta, en einhverjir eru farnir að nefna orðið spilling,“ segir Þórður Már meðal annars en færslu hans má sjá ívafaða hér undir fréttinni.

Kolbrún Garðarsdóttir, formaður FKL, segir í athugasemd við pistil Þórðar Más að gagnrýni sín snúi ekki bara að kynjahlutfalli, heldur „helst ógagnsæi um allt þetta ferli. Má ég ekki nota þessa samantekt um málið?“ spyr Kolbrún. Þórður telur það sjálfsagt og segir þetta ótækt með öllu.

Segir listann rúlla í réttri röð

Símon vísar ásökunum Þórðar Más á hendur sér alfarið á bug.



„Ég hef látið telja saman, í tilefni af þessari umfjöllun allri, hve mörg bú lögmenn hafa fengið síðustu 6 ár. Ég minni á að listinn rúllar í réttri röð. Ég gerði talningu þar sem fram kemur að lögmenn hafa verið að fá að jafnaði 21 til 22 mál í heildina síðustu 6 ár. Þeir fá úthlutað einu sinni á ári og nú er tveim búum úthlutað í einu. Þegar fleiri bú voru að koma inn var fleiri búum úthlutað í einu.

Sveinn Andri  hefur síðustu 6 ár fengið 21 þrotabú. Hann hefur því fengið jafn mörg bú og aðrir lögmenn.“

Símon áréttar það sem áður hefur komið fram um þessi stærstu bú.

„Þar hafa gilt önnur viðmið, eins og fram hefur komið. Ég tók ákvörðun um að úthluta Þorsteini Einarssyni og Sveini Andra Sveinssyni þrotabúi WOW air. Ég held að með sanngirni megi segja að engin slík tengsl séu á milli mín og Sveins Andra að hægt sé að halda því fram að ég hafi ástæðu til að hygla honum.“

Aldrei sýknað í málum Sveins Andra

Og þá bendir Símon jafnframt á, en Vísir hefur spurt ítarlega út í meint tengsl hans og embættisins alls við Svein Andra samkvæmt ábendingum sem borist hafa, að erfitt sé að komast hjá því að menn geti fundið til einhverja slíka þræði.

„Í jafn litlu landi og okkar þekkjast lögmenn og dómarar í nokkrum mæli, enda til skamms tíma einungis einn lagaskóli í landinu. Sveinn Andri hefur margoft verið verjandi í sakamálum hjá mér. Ég minnist þess ekki að í neinu tilfella hafi ég sýknað skjólstæðinga hans þó svo hann geri í flestum tilvikum kröfu um sýknu. Ég held að það segi sína sögu,“ segir Símon.