Eldri bróðir Simone Biles sakaður um að myrða þrjá menn

Hinn 24 ára gamli Tevin Biles-Thomas hefur verið ákærður fyrir skotárás í Cleveland í Bandaríkjunum síðastliðið gamlárskvöld. Þrír létu lífið og tveir særðust en fjölmiðlar vestanhafs greina frá því að Tevin þessi sé eldri bróðir fimleikastjörnunnar Simone Biles sem er margfaldur Ólympíuverðlaunahafi.

Tevin var handtekinn vegna skotárásarinnar sem átti sér stað í íbúð sem var leigð út á Airbnb.

Í yfirlýsingu frá lögreglunni í Cleveland kemur fram að til átaka hafi komið á milli tveggja hópa sem leiddi til þess að þrír karlmenn, á aldrinum 19 til 23 ára, létu lífið.