Fundað í rammgirtum Höfða

Gríðarlegur viðbúnaður er vegna opinberrar heimsóknar Mikes Pence, varaforseta Bandaríkjanna, til landsins í dag. Pence lendir á Íslandi um hádegi en nokkur hundruð bandarískir starfsmenn ráðherrans auk leyniþjónustumanna eru á landinu vegna heimsóknarinnar. Pence kemur hingað beint frá Írlandi þar sem hann átti fundi með þarlendum ráðamönnum.

Mun Pence funda með Guðlaugi Þór Þórðarsyni utanríkisráðherra í Höfða og munu þeir ræða viðskiptamál en einnig öryggis- og varnarmál. Auk fundar með utanríkisráðherra mun Pence einnig hitta Dag B. Eggertsson borgarstjóra í Höfða. Miklar öryggisráðstafanir hafa verið gerðar í kringum Höfða vegna fundarhaldanna og verður Borgartúni og mögulega fleiri götum lokað um tíma.

Samkvæmt heimildum Fréttablaðsins hittir Pence Guðna Th. Jóhannesson, forseta Íslands, klukkan tvö í dag, áður en viðskiptaþing ráðherranna hefst klukkan 14.30. Til stóð að Pence snæddi hádegisverð með forsetanum á Bessastöðum en samkvæmt heimildum Fréttablaðsins vannst ekki tími til að undirbúa fundinn nægilega í forsetabústaðnum og mun fundurinn mun því hafa verið fluttur og verður annaðhvort í bandaríska sendiráðinu eða í Höfða þar sem öryggisgæsla er gríðarleg. 

Eins og áður hefur komið fram mun Pence hitta Katrínu Jakobsdóttur forsætisráðherra í húsnæði Landhelgisgæslunnar á Keflavíkurflugvelli í kvöld. Katrín verður þá nýkomin af þingi Norrænu verkalýðshreyfingarinnar sem hún ávarpaði.

Boðað hefur verið til baráttufundar gegn Pence á Austurvelli klukkan 17.30. í dag og þar hyggjast ýmis samtök koma saman til að mótmæla stefnu Trump-stjórnarinnar. Er yfirskrift fundarins: „Partý gegn Pence: stöndum með friði, frelsi og grænni framtíð“.

Umdeildur og sagður úr takti við nútímann

36 ár eru liðin síðan varaforseti Bandaríkjanna sótti Ísland heim. Sá fulltrúi Bandaríkjastjórnar sem senn stígur fæti á íslenska grund er þó einn sá allra umdeildasti sem gegnt hefur embættinu. Helgast það ekki síst því að Pence er kristinn íhaldsmaður fram í fingurgóma og er á öndverðum meiði við þá bylgju frjálslyndis sem hefur einkennt vestræn samfélög undanfarna áratugi. Þannig er hann harður andstæðingur fóstureyðinga, trúir ekki á loftslagsbreytingar og hefur verið sakaður um að hafa allan sinn feril lagt stein í götu réttindabaráttu samkynhneigðra.

Eftir farsælan útvarpsferil komst Pence á þing árið 2001 og tólf árum síðar vann hann nauman sigur í ríkisstjórakosningum í heimafylki sínu, Indiana. Ein umdeildasta lagsetningin sem hann stóð fyrir þegar hann gegndi embættinu voru lög um endurreisn trúfrelsis. Lögin gerðu einstaklingum og fyrirtækjum rétt til þess að nota trú sína sem vörn í dómsmálum.Nokkrir veitingastaðaeigendur nýttu lögin til að neita samkynhneigðum pörum um þjónustu á þeim grundvelli að kynhneigð þeirra stríddi gegn trú veitingamannanna. Vakti málið gríðarlega athygli í Bandaríkjunum.

Pence virðist afar hreykinn af skoðunum sínum og í viðtali við New York Times árið 2016 kvaðst hann vera stoltur af því að vera úr takti við nútímann hverju sinni.

Það benti þó fátt til þess að Pence myndi feta þá braut í æsku. Hann er af írsku bergi brotinn og var alinn upp í kaþólskri trú. Á táningsárum hans vann hann sem sjálfboðaliði fyrir Demókrata og var stoltur meðlimur flokksins. Þá voru John F. Kennedy og Martin Luther King hans helstu fyrirmyndir.

Á háskólaárum Pence, þar sem hann lærði lögfræði, umturnaðist pólitísk sýn hans og hann færði sig yfir á hægri væng stjórnmálanna. Hefur hann nefnt Ronald Reagan sem sinn helsta áhrifavald. Hann kynntist eiginkonu sinni, hinni fráskildu Karen, á þessum árum og saman gengu þau evangelísku kirkjunni á hönd í óþökk móður Mike.

Karen stendur eins og klettur á bak við eiginmann sinn og það vakti það athygli árið 2002 þegar Pence sagðist aldrei snæða einn með annarri konu en eiginkonu sinni. Þá færi hann ekki á samkomum þar sem áfengi er haft um hönd án konu sinnar.