Talsvert slasaður eftir fall úr mikilli hæð

Maður var fluttur töluvert slasaður á sjúkrahús eftir vinnuslys við nýbyggingu í austurborg Reykjavíkur nú skömmu fyrir klukkan fimm. Samkvæmt upplýsingum frá slökkviliði höfuðborgarsvæðisins féll maðurinn úr mikilli hæð.

Auk viðbúnaðs frá slökkviliðinu rannsaka lögregla og Vinnueftirlitið nú vettvang slyssins. Ekki er frekari upplýsingar að fá um slysið eða líðan mannsins að svo stöddu. Mbl greindi fyrst frá málinu.

Mikill erill hefur verið hjá slökkviliði höfuðborgarsvæðisins í dag, að sögn varðstjóra. Sjúkraflutningamenn hafa sinnt tólf verkefnum tengdum kórónuveirunni og þá hafa dælubílar verið sendir í minniháttar útköll vegna elda og umferðaróhappa.