KKÍ aflýsir öllum fjölliðamótum í mars en deildarleikir fara fram

Körfuknattleikssamband Íslands hefur aflýst öllum körfuboltaleikjum í fjölliðamótum yngri flokka í þessum mánuði vegna kórónuveirunnar.

Leikir í deildarkeppninni, þar á meðal Domino´s deildunum fara fram samkvæmt leikjaskrá en staðan hvað þá leiki varðar verður metin daglega og allar ákvarðanir tilkynntar hlutaðeigandi aðilum.

KKÍ fundaði í gær með ÍSÍ og öðrum sérsamböndum vegna þeirrar stöðu sem upp er komin vegna kórónaveirunnar og áhrif hennar á samfélagið.

Á fundinum var ákveðið að standa við mótahaldið þar til tilmæli um annað kæmu frá yfirvöldum. Hins vegar hafa aðstæður breyst þar sem bæði mótshaldarar hafa lýst yfir áhyggjum af því að halda úti mótum, sem og einhver félög hafa afboðað sig.

KKÍ hefur því ákveðið að fresta öllum fjölliðamótum fram yfir páska. Þetta hefur áhrif á eftirfarandi flokka og deildir:

Minnibolti 10 ára, drengir og stúlkur

Minnibolti 11 ára, drengir og stúlkur

7. flokkur, drengir og stúlkur

8. flokkur, drengir og stúlkur

9. flokkur, drengir og stúlkur

2. deild kvenna, fjölliðamót

KKÍ mun tilkynna sérstaklega um framhaldið hjá þessum flokkum. Ítrekað er að aðrir leikir í öðrum flokkum og keppnum fara fram skv. leikjadagskrá, en staðan hvað það varðar verður metin daglega og allar ákvarðanir tilkynntar hlutaðeigandi aðilum.

Af gefnu tilefni vill KKÍ árétta að allir aðilar, bæði þáttakendur, skipuleggjendur og aðrir fari að leiðbeiningum almannavarna.