FC Ís­land gegn tæplega fimm hundruð landsleikja liði í Laugar­dalnum í kvöld

Það er forvitnilegur leikur í Laugardalnum í kvöld er liðið FC Ísland mætir í fyrsta sinn kvennaliði en það er ekkert venjulegt kvennalið.

FC Ísland er skipað mörgum fyrrum atvinnu- og landsliðsmönnum sem og öðrum fyrrum knattspyrnumönnum en þeir hafa hingað til spilað í Vestmannaeyjum, á Akureyri og á Akranesi.

Liðið spilar við goðsagnir í hverjum bæjarhluta fyrir sig, allt í nafni góðgerðamála, en í kvöld verður leikið í Reykjavík. Flautað verður til leiks klukkan 20.00 og nú eru það góðgerðasamtökin Samferða sem á að styrkja.

Þjálfari FC Ísland eru þeir Tómas Ingi Tómasson, fyrrum atvinnumaður og nú sparkspekingur, en honum til aðstoðar er Sverrir Þór Sverrisson, skemmtikraftur. Í liðinu eru m.a. Tryggvi Guðmundsson, Brynjar Björn Gunnarsson og Ingólfur veðurguð Þórarinsson.

Þeir mæta kvennaliði í fyrsta sinn í kvöld en Helena Ólafsdóttir hefur tekið að sér að setja saman og þjálfa hóp kvenna sem ætlar að keppa við strákana.

Þar eru margar kempur sem eiga fjöldann allan af landsleikjum, t.a.m. Ásta Árnadóttir, Vanda Sigurgeirsdóttir og Ásthildur Helgadóttir.

Samanlagður fjöldi landsleikja hjá leikmönnum Reykjavíkur eru tæplega fimm hundruð leikir.

Nánari upplýsingar um leikinn má finna hér.