Bjartsýnn varðandi þróun bóluefnis

Anthony Fauci, yfirmaður Ofnæmis- og smitsjúkdómastofnunar Bandaríkjanna, segist mátulega bjartsýnn á að bóluefni við Covid-19, sjúkdómnum sem nýja kórónuveiran veldur, muni líta dagsins ljós á þessu ári. Þannig yrði mögulegt að koma því í almenna dreifingu snemma á næsta ári.

Þetta sagði Fauci á fundi nefndar fulltrúadeildar Bandaríkjaþings um kórónuveiruna sem fór fram í dag. Þar sagði hann einni að í gærkvöldi hefðu 250 þúsund manns boðist til að taka þátt í tilraunum á bóluefni fyrirtækisins Moderna og National Institutes of Health, sem þykir mjög efnilegt.

Lyfjafyrirtæki um heim allan keppast nú um að framleiða mótefni við Covid-19. Slíkt yrði mikill sigur fyrir það ríki sem verður fyrst, bæði pólitískt séð og vísindalega. Þar að auki gæti það verið reynst ríkjunum vel, efnahagslega.

Hvíta húsið hefur sett á laggirnar sérstaklega áætlun sem heitir „Operation Warp Speed“ og er markmið hennar að framleiða 300 milljónir skammta af bóluefni eins fljótt og auðið er.

Demókratinn James E. Clyburn spurði Fauci út í hvernig það hefði gerst að ríki Evrópu virtust hafa náð mun betri tökum á faraldrinum en Bandaríkin. Hann sagði svarið í raun vera flókið en dró það verulega saman. Hann sagði útgöngubann og félagsforðun í Evrópu hafa verið mun umfangsmeiri en í Bandaríkjunum.

Evrópuríki hafi lokað um 90 prósentum en Bandaríkin bara helmingnum.

Þar að auki hefðu þær aðgerðir sem gripið var til verið felldar niður of snemma. Svar hans má sjá hér að neðan.

Fauci ítrekaði að Bandaríkjamenn þyrfti að girða sig í brók, ef svo má að orði komast. Herða ferðatakmarkanir og félagsforðun og vera með grímur. Í gær var tilkynnt að nærri því 70 þúsund hefðu smitast af veirunni, svo vitað væri, frá deginum áður.

Nærri því 4,5 milljónir manna hafa smitast af veirunni í Bandaríkjunum. Þá hafa rúmlega 152 þúsund manns dáið hennar vegna, miðað við opinberar tölur. Næsta ríki á eftir er Brasilía þar sem 2,6 milljónir hafa smitast og 91 þúsund dáið.

Svo virðist sem að Donald Trump, forseti Bandaríkjanna, hafi verið að fylgjast með fundinum en hann tísti um hann og Clyburn. Hann hafði sýnt línurit yfir fjölda nýsmitaðra þar sem Bandaríkin voru borin saman við Evrópu (Hægt að sjá á myndbandinu hér að ofan).

Í tísti sínu sagði Trump enn og aftur að eina ástæðan fyrir því að svo margir væru smitaðir í Bandaríkjunum væri vegna þess hve umfangsmikil skimun Bandaríkjamanna væri. Sem er ekki rétt.

Jafnvel þó skimunin væri engin yrði fólk áfram smitað og veikt. Fólk héldi áfram að deyja þó skimunin væri ekki til staðar.

Þá er einnig rangt að skimun Bandaríkjanna sé umfangsmeiri en nokkurs staðar annars staðar, sé miðað við höfðatölu, og að þó nokkur ríki skimi betur. Ofan á það er tíðni jákvæðra prófa hærri í Bandaríkjunum en annarsstaðar.