Kínverski samfélagsmiðillinn Tiktok verður bannaður í Bandaríkjunum, að sögn Donalds Trump Bandaríkjaforseta. Hann boðar tilskipun þess efnis, jafnvel strax í dag. Forsetanum hugnast ekki að bandarískt fyrirtæki eins og Microsoft kaupi starfsemi Tiktok í Bandaríkjunum.
Styr hefur staðið um myndbandsdeilisnjallforritið Tiktok undanfarnar vikur. Það hefur notið vaxandi vinsælda en áhyggjur af hafa verið af persónuupplýsingum notenda sem forritið safnar. Stjórnendur Tiktok hafna því að það kínverska ríkið stýri því eða fái gögn um notendur.
Trump sagði fréttamönnum í forsetaflugvél sinni í gær að ríkisstjórn hans ætlaði sér að banna miðilinn. Til þess ætlaði hann að nota neyðarheimildir eða forsetatilskipun.
„Ég hef valdið. Það verður skrifað undir þetta á morgun,“ fullyrti forsetinn í gær.
Fréttir hafa verið um áhuga bandarískra fyrirtækja eins og Microsoft á því að kaupa eða fjárfesta í Tiktok en Trump gaf lítið fyrir það, að sögn Washington Post.
„Það eru nokkrir möguleikar en að er margt að gerast, þannig að við sjáum til hvað gerist. Við erum að skoða ýmsa möguleika hvað varðar Tiktok,“ sagði forsetinn.
Tiktok tjáði sig ekki beint um hótanir Trump í gær en fyrirtækið sagðist í yfirlýsingu fullvisst um langtímastöðu sína.
Samskipti Kína og Bandaríkjanna hafa farið versnandi undanfarin misseri. Stjórn Trump hefur þrýst á önnur vestræn ríki að útiloka kínverska tæknifyrirtækið Huawei frá 5G-væðingu fjarskiptakerfa sinna. Þá ráku ríkin ræðismenn hvors annars úr landi eftir að Bandaríkjastjórn skipaði fyrst ræðismanni Kína í Houston að hafa sig á brott og vísaði til hugverkastuldar.
