Liverpool mætir Shrewsbury Town í ensku bikarkeppninni um næstu helgi þar sem liðin keppa um hvort þeirra fær að mæta Chelsea í sextán liða úrslitunum. Þetta verður hins umdeildur leikur vegna ákvörðunar knattspyrnustjóra Liverpool.
Jürgen Klopp ætlar ekki að nota leikmenn aðalliðsins í þessum leik og hann ætlar ekki einu sinni að mæta sjálfur. Hann og Liverpool mennirnir verða í vetrarfríi að safna kröftum fyrir lokasprettinn.
Klopp sagðist hafa á sínum tíma fengið fyrirmæli frá enska knattspyrnusambandinu um að virða vetrarfríið og það ætli hann að gera.
Í stað leikmanna aðalliðs Liverpool munu liðsmenn 23 ára liðs Liverpool spila leikinn á móti Shrewsbury Town og það er óhætt að segja að sigurlíkur liðsins hafi minnkað talsvert við þessar fréttir.
Leikurinn við Shrewsbury Town fer fram á Anfield og það var ljóst að þessar fréttir myndu hafa áhrif á aðsóknina á leikinn.
Liverpool hefur nú ákveðið að koma til móts við stuðningsmenn sína með því að bjóða þeim miðana á leikinn á helmingsafslætti.
Miðar á bikarleikinn á móti Shrewsbury Town munu kosta fimmtán pund fyrir fullorðna, fimm pund fyrir unglinga og eitt pund fyrir börn.
Uppfært á íslenska krónu þá munu miðarnir kosta 2500 krónur fyrir fullorðna, 800 krónur fyrir unglinga og 162 krónur fyrir börn.
