Sjö sóttu um stöðu Borgarleikhússtjóra, sem auglýst var til umsóknar þann 16. janúar síðastliðinn. Stjórn Leikfélags Reykjavíkur vinnur nú úr umsóknunum og mun birta niðurstöðu sína á næstu vikum, að því er fram kemur í tilkynningu frá stjórn LR. Listi yfir umsækjendur verður ekki birtur.
Seinna ráðningartímabil Kristínar Eysteinsdóttur, núverandi Borgarleikhússtjóra, rennur út í júlí á næsta ári. Umsóknarfrestur rann út 30. janúar síðastliðinn en í auglýsingu um umsóknarferlið var tekið fram að stjórn LR vildi undirbúa ráðningu eftirmanns Kristínar tímanlega.
Kristín hefur verið leikhússtjóri frá árinu 2014. Nýr leikhússtjóri mun byrja að vinna með Kristínu strax í upphafi árs 2021.
