Lamdi andstæðing með hjálmi og þykir hafa sloppið vel

NFL-deildin tilkynnti í gær að varnarmaður Cleveland Browns, Myles Garrett, væri kominn úr leikbanni og það kom mörgum á óvart.

Garrett reif hjálminn af Mason Rudolph, leikstjórnanda Pittsburgh Steelers, og notaði hann til þess að lemja leikstjórnandann í hausinn.

Hann fékk strax leikbann sem var ótímabundið. Flestir áttu von á því að hann myndi byrja næsta tímabil í banni þar sem hann missti aðeins sex leiki úr á nýliðinni leiktíð.

NFL-deildin er ekki í refsistuði og hefur aflétt banninu svo leikmaðurinn getur farið beint að æfa með félögum sínum.