Búið að færa bikarúrslitaleik kvenna í fótbolta fram í nóvember

Mótanefnd Knattspyrnusambands Íslands hefur ákveðið að færa leiki í átta liða úrslitum Mjólkurbikar kvenna sem um leið hefur áhrif á framhald keppninnar.

Átta liða úrslitin áttu að fara fram 11. til 12. ágúst en varð frestað þegar öll knattspyrnuiðkun á Íslandi var stöðvuð um mánaðamótin júlí-ágúst vegna útbreiðslu kórónuveirunnar

Leikirnir hafa nú verið settir á 3. september næstkomandi.

Það þurfti í framhaldinu að gera breytingar á lokaleikjum Mjólkurbikars kvenna.

Undanúrslitin hafa nú verið verið færð til 1. nóvember og úrslitaleikur keppninnar verður spilaður 6. nóvember. Bikarinn fer því á loft í næstsíðasta mánuði ársins.

Selfosskonur unnu bikarinn í fyrra og eru enn með í keppninni. Selfossliðið fékk bikarinn í hendurnar 17. ágúst 2019 og verður því að minnsta kosti ríkjandi bikarmeistari í tæpa fimmtán mánuði.