Yfirvöld í Namibíu hafa fengið afhent gögn frá Íslandi og Noregi sem sögð eru nýtast við rannsókn spillingarlögreglunnar ACC á hluta Samherjamálsins. Greint er frá þessu á vef namibíska fjölmiðilsins Informante.
Ríkislögmaður Namibíu óskaði á föstudag eftir fresti til að ljúka við rannsóknina. Í skýrslu aðalrannsakanda vegna frestbeiðninnar segir að tímafrekt sé að fara yfir gögnin og að embættið þurfi um mánuð til þess.
Á vef Ríkisútvarpsins segir að gögnin séu sögð tengjast félaginu Namgomar, en Bernhardt Esau, fyrrverandi sjávarútvegsráðherra landsins, hefur verið sakaður um að misbeita valdi í ráðherratíð sinni þegar hann úthlutaði brynstirtlukvóta til félagsins Namgomar Pesca á árunum 2014 til 2019.
